Khaosod
Online

วันพฤหัสบดี ที่ 9 เม.ย. 2563

COVID-19 ကြောင့် ဒေါ်လာ သန်းရာနဲ့ချီပြီး နယ်စပ်ကုန်သွယ်ရေး ထိခိုက်

23 มี.ค. 2563 - 18:55 น.

ကိုရိုနာဗိုင်းရပ်စ် ကူးစက်မှုတွေကြောင့် ကမ္ဘာတဝန်း နိုင်ငံတွေမှာ ကုန်သွယ် စီးပွားရေး ကျဆင်းနေချိန်မှာ မြန်မာ့ကုန်သွယ်ရေးမှာလည်း ရိုက်ခတ်မှုတွေ ရှိနေတာဖြစ်ပါတယ်။

မြန်မာအစိုးရကလည်း COVID-19 ကူးစက်မှုကို ထိန်းချုပ်ဖို့ ကြိုးစားတဲ့အနေနဲ့ မြန်မာနိုင်ငံနဲ့ ထိစပ်နေတဲ့ နယ်စပ်ဂိတ်တွေမှာ ကုန်ပစ္စည်းတွေနဲ့ လူအဝင်အထွက် သွားလာမှုတွေ ကန့်သတ်နေတာကြောင့် နယ်စပ်ကုန်သွယ်ရေးမှာ နေ့စဉ် ဒေါ်လာသန်းနဲ့ချီပြီး ထိခိုက်မှုတွေ ရှိနေပါတယ်။

တရုတ်-မြန်မာ နယ်စပ် ကုန်သွယ်ရေး

တရုတ်နှစ်သစ်ကူး ဇန်နဝါရီ ၂၃ ရက်နေ့ ကနေ မတ်လ ၁၄ ရက်နေ့အထိ တရုတ်-မြန်မာ နယ်စပ်ကုန်သွယ်မှုက ပြီးခဲ့တဲ့ ဘဏ္ဍာနှစ်နဲ့ နှိုင်းယှဉ်မယ်ဆိုရင် စုစုပေါင်း ပို့ကုန် သွင်းကုန်တန်ဖိုး အမေရိကန်ဒေါ်လာ ၂၇၁ သန်းခန့် (ပို့ကုန် ဒေါ်လာ ၂၂၃ သန်း၊ သွင်းကုန် ၄၈ သန်း) လျော့နည်းခဲ့ပါတယ်။

"ကိုဗစ်ကြောင့် တရုတ်-မြန်မာ နယ်စပ်ကုန်သွယ်ရေးက အတော်ထိခိုက်ခဲ့ပါတယ်၊ ကန်ပိုက်တီး၊ ချင်းရွှေဟော် နယ်စပ်ဂိတ်တွေကတော့ ခုထိ ပုံမှန်ပြန်မဖြစ်သေးပါဘူး" လို့ စီးပွားရေးနဲ့ ကူးသန်းရောင်းဝယ်ရေးဝန်ကြီးဌာန လက်ထောက် အတွင်းဝန် ဦးခင်မောင်လွင်က ပြောပါတယ်။

နယ်စပ်ကုန်သွယ်ရေးဟာ တရုတ်-မြန်မာနယ်စပ်မှာ အများဆုံးရှိနေပြီး မူဆယ်ဂိတ်မှာဆိုရင် နေ့စဉ် ဒေါ်လာ ၁၀ သန်းကနေ ၁၅ သန်းအထိ ကုန်သွယ်မှု ရှိနေပါတယ်။

ထိုင်း-မြန်မာ နယ်စပ်ကုန်သွယ်ရေး

ထိုင်း-မြန်မာ နယ်စပ်ကတော့ ဒုတိယအများဆုံးဖြစ်ပြီး အဓိက ဝင်ပေါက်တွေဖြစ်တဲ့ ကရင်ပြည်နယ် မြဝတီနဲ့ ရှမ်းပြည်နယ်ထဲက တာချီလိတ် ဂိတ်တွေမှာ နယ်စပ်ကုန်သွယ်ရေးက နေ့စဉ် ဒေါ်လာ ၁၀ သန်းလောက်အထိ ရှိပါတယ်။

ကိုရိုနာဗိုင်းရပ်စပ် ကူးစက်မှုကို ကြိုတင်ကာကွယ်တဲ့အနေနဲ့ ထိုင်း-မြန်မာ နယ်စပ်အားလုံးနီးပါးမှာ အဝင်အထွက်တွေကို ကန့်သတ်နေပြီး တာချီလိတ်နဲ့ ချစ်ကြည်ရေးတံတား အမှတ် (၁) အပါအဝင် မယ်ဟောင်ဆောင်၊ ရနောင်းစတဲ့ မြန်မာနယ်နဲ့ ထိစပ်နေတဲ့ နယ်စပ်လမ်းတွေကို မတ်လ ၂၀ ရက်နေ့က ပိတ်ခဲ့ပါတယ်။

"လူအဝင်အထွက်ရော၊ ကုန်ပစ္စည်းအဝင်အထွက်ရော တာချီလိတ်နဲ့ အမှတ် (၁) တံတား၊ ၂ ခုလုံးကို ပိတ်ထားပါပြီ" လို့ ဦးခင်မောင်လွင်က ပြောပါတယ်။

နယ်စပ်ကုန်သွယ်ရေးမှာ အခရာကျတဲ့ ဂိတ်စခန်းတစ်ခုဖြစ်တဲ့ ချစ်ကြည်ရေး တံတားအမှတ် ၂ ကိုတော့ မတ်လ ၂၃ ရက်နေ့ကစလို့ ထိုင်းဘက်အခြမ်းက ပိတ်ခဲ့ပါတယ်။

ဒါပေမဲ့လည်း ထောင်နဲ့ချီတဲ့ ရွှေ့ပြောင်းလုပ်သားတွေဟာ မြန်မာနိုင်ငံဘက်အခြမ်းကို ပြန်လာနေကြဆဲဖြစ်လို့ မြန်မာဘက်အခြမ်းက ဂိတ်တွေဖွင့်ပြီး ပြန်လက်ခံနေရပါတယ်။

"အဲ့ဒီတံတားမှာ လူအဝင်အထွက်ကိုပဲ ပိတ်လိုက်တာပါ၊ ကုန်ပစ္စည်းတွေတော့ သွားလို့ရပါသေးတယ်၊ ကုန်ပစ္စည်းတင်တဲ့ ယာဉ်တွေမှာ ယာဉ်မောင်းနဲ့ ယာဉ်နောက်လိုက် ၁ ယောက် ဝင်ထွက်ခွင့် ပြုထားပါတယ်" လို့ လက်ထောက်အတွင်းဝန် ဦးခင်မောင်လွင်က ပြောပါတယ်။

အိန္ဒိယ-မြန်မာ နယ်စပ် ကုန်သွယ်ရေး

အိန္ဒိယ-မြန်မာနယ်စပ်မှာတော့ အဓိက ကုန်သွယ်ရေးလမ်းကြောင်း ဖြစ်တဲ့ တမူးနယ်စပ်ဂိတ်ကို အိန္ဒိယဘက်ကနေ မတ်လ ၁၀ ရက်နေ့ကတည်းက စပိတ်ထားခဲ့ပါတယ်။

ဒါ့ကြောင့် နယ်စပ်ကုန်သွယ်ရေးက နေ့စဉ် ဒေါ်လာ ၁ သိန်းဖိုးလောက် ဆုံးရှုံးနေရတယ်လို့ စီးပွားရေးနဲ့ ကူးသန်းရောင်းဝယ်ရေးဝန်ကြီးဌာနရဲ့ စာရင်းတွေက ဆိုပါတယ်။

"ဒီကာလမှာ အနည်းနဲ့ အများတော့ ကုန်သွယ်မှု ထိခိုက်တာပေါ့၊ တမူးကို ပိတ်ထားပေမယ့် ရိခေါဒါရ်ဘက်ကတဆင့် ကုန်ပစ္စည်းပို့ဖို့ ဆောင်ရွက်နေပါတယ်" လို့ ဦးခင်မောင်လွင်က ပြောပါတယ်။

တမူး နယ်စပ်ဂိတ်ကို ဧပြီလကုန်မှ ပြန်ဖွင့်မယ်လို့ အိန္ဒိယဘက်က ကြေညာထားပါတယ်။

COVID-19 နဲ့ နယ်စပ်ကုန်သွယ်ရေး ဂယက်

အဓိက နယ်စပ်ဂိတ်ကြီးတွေ ပိတ်ထားပေမယ့် စီးပွားကူးသန်းက လက်ထောက်အတွင်းဝန် ဦးခင်မောင်လွင်ကတော့ အကောင်းမြင်စိတ် ရှိနေပါတယ်။ ကိုရိုနာကူးစက်မှုတွေ မဖြစ်ခင် အောက်တိုဘာကနေ မတ်လအထိ ၅ လကျော်ကာလအတွင်း နယ်စပ်ကုန်သွယ်မှုက ပြီးခဲ့တဲ့ နှစ်ကထက် ပိုခဲ့တယ်လို့ ပြောပါတယ်။

"ကိုဗစ်ကြောင့် တရုတ် နယ်စပ်ဂိတ်တွေ ပိတ်ခဲ့ပေမယ့်လည်း လွယ်ဂျယ်နဲ့ မူဆယ်က ပုံမှန် အနေအထား ပြန်ရောက်နေပါပြီ၊ မူဆယ်မှာဆို နေ့စဉ် ကားအစီး ၅၀ လောက် နေ့စဉ် ဝင်နေတယ်၊ ကုန်သွယ်ရေးက ပုံမှန် ပြန်ဖြစ်နေပါလာပြီ" လို့ ပြောပါတယ်။

ဒါပေမဲ့လည်း ကျွဲ၊ နွားအရှင် တင်ပို့မှု၊ ရေထွက်ပစ္စည်း တင်ပို့မှုတွေက တုံ့ဆိုင်းနေဆဲ ဖြစ်ပါတယ်။ ဖရဲ၊ သခွား၊ ဆန်၊ ပြောင်း လို စားကုန်ပစ္စည်းတွေ တင်ပို့မှုကလည်း အရင်ကလောက် အလုပ်မဖြစ်သေးဘူး" လို့ ကုန်သည်တွေဘက်က ပြောပါတယ်။

"ကိုရိုနာဗိုင်းရပ်စ်ဖြစ်တော့ တရုတ်နယ်စပ် ကုန်သွယ်မှုမှာ ပြောင်းတင်ပို့မှုက ရပ်ဆိုင်းလုနီး အခြေအနေ ဖြစ်သွားတယ်၊ ဒါ့ကြောင့် ထိုင်းဘက်ကို တင်ပို့ခဲ့တယ်၊ ၅ လအတွင်း မြဝတီနဲ့ တာချီလိတ်မှာ ပြောင်းတန်ချိန် ၅ သိန်းကျော် တင်ပို့နိုင်ခဲ့တယ်" လို့ ဦးခင်မောင်လွင်က ပြောပါတယ်။

မြဝတီကုန်သည်တွေကတော့ လက်ရှိမှာ ထိုင်းဘက်အခြမ်းကို ပြောင်းတင်ပို့မှုက တော်တော်လေး နည်းသွားပြီ လို့ ပြောပါတယ်။

"အရင်ကဆို တနေ့ကို ပြောင်းကား ရာနဲ့ချီပြီး ထွက်တယ်၊ ခုဆို အစီး ၂၀ လောက်ပဲ ရှိတော့တယ်၊ မြေပဲဆန်၊ မကျည်းသီး၊ ငရုတ်သီး တင်ပို့မှုကလည်း မရှိသလောက်ပဲ၊ ပို့ကုန်က လုံး၀ မျှော်လင့်လို့ မရတော့ဘူး" လို့ မြဝတီကုန်သည်ကြီးများအသင်းက စာရင်းစစ် စိုင်းထွန်းဝေက ဘီဘီစီကို ပြောပါတယ်။

မြန်မာဘက်က ပို့ကုန်တွေ ရပ်ဆိုင်းလုနီး ဖြစ်နေသလို ထိုင်းဘက်ကလည်း အချိုရည်၊ ခေါက်ဆွဲခြောက်လို စားသောက်ကုန်ပစ္စည်းအချို့လောက်ပဲ တင်ပို့နေပြီး ကြီးကြီးမားမား တင်ပို့မှု မရှိတော့ဘူးလို့ မြဝတီကုန်သည်ကြီးများအသင်း တာဝန်ရှိသူက ပြောပါတယ်။

နယ်စပ်ဂိတ်တွေ ပိတ်လိုက်တာကြောင့် ထိုင်း-မြန်မာ နယ်စပ်ကုန်သွယ်ရေးဟာ အရင်လတုန်းက နေ့စဉ် ဒေါ်လာ ၁၀ သန်းလောက် ရှိခဲ့ရာကနေ အခုလမှာ ကုန်သွယ်ရေးဟာ ဒေါ်လာ ၃ သန်းကနေ ၄ သန်းအထိပဲ ရှိတော့မယ်လို့ ကုန်သည်တွေဘက်က ခန့်မှန်းနေကြပါတယ်။

"အရင်ကဆို ပစ္စည်းပို့လိုက်ပြီးမှ လူက ထိုင်းဘက်အခြမ်းသွားပြီး ငွေပေး ပေးယူ လုပ်တယ်လေ၊ အခု လူအဝင်အထွက် ကန့်သတ်လိုက်တော့ အလုပ်မဖြစ်တော့ဘူး၊ ပစ္စည်းပို့လိုက်ရင်လည်း ထိုင်ဘက်ကမ်းက လာဝယ်ချင်မှ ဝယ်တာ" လို့ မြဝတီကုန်သည်ကြီးများအသင်းက စာရင်းစစ် စိုင်းထွန်းဝေက ပြောပါတယ်။

ကိုဗစ်ကြောင့် နယ်စပ်ကုန်သွယ်ရေး ဘယ်လောက် ဆုံးရှုံးနိုင်သလဲလို့ ဘီဘီစီက မေးရာမှာတော့ "မနှစ်က အခြေအနေနဲ့ ဒီနှစ်အခြေအနေ သုံးသပ်ပြီး ဘယ်လောက်ထိခိုက်နိုင်လဲဆိုတာ ပြန်ပြီး တွက်ချက်နေတယ်" လို့ ဦးခင်မောင်လွင်က ပြန်ဖြေပါတယ်။

မြဝတီကုန်သည်ကြီးများအသင်းက စာရင်းစစ် စိုင်းထွန်းဝေကတော့"ဒီကုန်သွယ်ရေး ရပ်ဆိုင်းမှုက ဘယ်လောက်ကြာမလဲ၊ ဘာတွေ လုပ်ထားသင့်လဲဆိုတာ ကုန်သည်ကြီးတွေ တွေ့ဆုံပြီး ဆွေးနွေးကြဖို့ ရှိပါတယ်၊ ဒီလိုမှမဟုတ်ရင် နယ်စပ်ကုန်သွယ်ရေးက အများကြီး ထိခိုက်လာပါလိမ့်မယ်" လို့ ပြောပါတယ်။


ติดตามข่าวสด


ข่าวเด่นประจำวัน













ภาพที่



อัลบั้มภาพ COVID-19 ကြောင့် ဒေါ်လာ သန်းရာနဲ့ချီပြီး နယ်စပ်ကုန်သွယ်ရေး ထိခိုက်
ข่าวที่เกี่ยวข้อง