Khaosod
Online

วันพฤหัสบดี ที่ 9 เม.ย. 2563

နယ်ခြားစောင့်ရဲကားတန်းကိုအေအေတိုက် အရာရှိကြီးတစ်ဦးအပါအဝင် ၃ ဦးကျဆုံး

24 มี.ค. 2563 - 19:58 น.

ရခိုင်လက်နက်ကိုင် အဖွဲ့(AA) ကို အကြမ်းဖက်အုပ် စုနဲ့ မတရားအသင်းအဖြစ် အစိုး ရက မတ်လ ၂၃ရက်နေ့ညက ထုတ်ပြန် ကြေညာလိုက်ပြီး နောက်တစ်ရက်မှာပဲ ရခိုင်ပြည်နယ် ၊ အနောက်ဘက်နယ်စပ်၊ မောင်တောမြို့နယ် မြောက်ပိုင်းမှာ ဒီနေ့ မတ်လ ၂၄ ရက် မနက် ၇ နာရီခန့်က နယ်ခြားစောင့်ရဲကားတန်းတစ်ခု မိုင်းခွဲတိုက်ခိုက်ခံခဲ့ရပါတယ်။

ရဲအရာရှိကြီး တစ်ဦးအပါအဝင်၊ ရဲတပ်ဖွဲ့ဝင် ၃ ဦးကျဆုံးခဲ့ပြီး ၊၄ ဦးခန့် ဒဏ်ရာရရှိတယ်လို့ ဘီဘီစီ သတင်းထောက် ကပြောပါတယ် ။

နယ်ခြားစောင့်ရဲကားတန်း
Getty Images
မောင်တောမြို့နယ် မြောက်ပိုင်းတွင် မတ်လ ၂၄ ရက် မနက် ၇ နာရီခန့်က နယ်ခြားစောင့်ရဲကားတန်းတစ်ခု မိုင်းခွဲတိုက်ခိုက်ခံ

ရဲကားတန်း မိုင်းဆွဲတိုက်ခိုက်ခံရတဲ့ အတွက် နခက (၆) တပ်ရင်းမှူး ဒုရဲမှူးကြီးကျော်သူရ၊ ဒုရဲအုပ်မျိုးဇော်ဦးနှင့် တပ်သားဖြိုးမင်းသူ (ကားမောင်း)တို့ ကျဆုံးသွားခဲ့တယ်လို့ သိရပါတယ်။

သူတို့ဟာ တောင်ပြိုကနေ ကျီးကန်းပြင်ဌာနချုပ်ကို အစည်းအဝေး တက်ဖို့ ကားနှစ်စီးနဲ့လာစဉ် လိပ်ရကျေးရွာအနီးမှာ ဒီကနေ့ နံနက် ၇ နာရီက မိုင်းခွဲ တိုက်ခိုက်ခံခဲ့ရတာ ဖြစ်ပါတယ် ။

ဒီတိုက်ခိုက်ခံရမှု နဲ့ပတ်သက်လို့ဒေသ အာဏာပိုင်တွေကို ဆက်သွယ်လို့ မရသေးပါဘူး။

စစ်တွေအစိုးရအဖွဲ့ရုံး
Getty Images
၂၀၁၈ စစ်တွေအစိုးရအဖွဲ့ရုံးကို မိုင်းထောင်ဖောက်ခွဲမှု

မတ်လ ၂၃ ရက် ည ၈ နာရီ တွင် နိုင်ငံပိုင်သတင်းဌာနက AA နှင့်ပတ်သက်ပြီး ရခိုင်လက်နက်ကိုင် အဖွဲ့ (AA) ကို အကြမ်းဖက်အုပ် စုနှင့် မတရားအသင်းအဖြစ် အစိုး ရက ကြေညာလိုက်ပါတယ် ။ ။အကြမ်းဖက်မှုတိုက်ဖျက်ရေးဗဟိုအဖွဲ့ကြေညာ ချက်နဲ့ ပြည်ထဲရေးဝန်ကြီးဌာနက ထုတ်ပြန်ချက်ကို သတင်းဖော်ပြ ခဲ့တာဖြစ်ပါတယ်။

AA လက်နက်ကိုင်အဖွဲ့ ဟာ ရခိုင်ပြည်နယ်မြောက်ပိုင်းက ပြည်သူများကို စည်းရုံး၍လည်း ကောင်း၊ ရွာသားများကိုအကာ အကွယ် ရယူ၍လည်းကောင်း၊ တပ်မတော်စစ်ကြောင်းများနဲ့ မြန်မာနိုင်ငံရဲတပ်ဖွဲ့ဝင်များ၊ လုံ ခြုံရေးစခန်းများကို တိုက်ခိုက် ခြင်း၊ ကျေးရွာအုပ်ချုပ်ရေးမှူး များ၊ အစိုးရဝန်ထမ်းများ၊ အရပ် သားပြည်သူများကို ဖမ်းဆီးခြင်း၊ သတ်ဖြတ်ခြင်း၊ နှိပ်စက်ခြင်း၊ ကျေးရွာများအတွင်း ပစ်ခတ်ခြင်း နဲ့ မိုင်းထောင်ဖောက်ခွဲတာတွေ ကို ပြုလုပ်တဲ့အတွက်အကြမ်းဖက်အဖွဲ့အဖြစ်သတ်မှတ်တာလို့ အကြမ်းဖက် မှုတိုက်ဖျက်ရေးဗဟိုအဖွဲ့ ရဲ့ ကြေ ညာချက်မှာဖော်ပြထားပါတယ်။

နိုင်ငံတော် အတွင်း အခြေပြုပြီး နိုင်ငံတော်ကို အကြမ်း ဖက်မှုတွေ ကျူးလွန်နေကြောင်းနဲ့ အထက်ပါ အကြမ်းဖက်မှုတွေ ကို ကျူးလွန်တဲ့ AA လက်နက်ကိုင် အဖွဲ့ကို အကြမ်းဖက်အုပ်စုအဖြစ် ပြည်ထောင်အစိုးရအဖွဲ့၏ သ ဘောတူညီချက်နဲ့ ကြေညာတယ်လို့ လည်း ဖော်ပြထားပါတယ်။

မင်းပြား
AFP
မင်းပြား စစ်သင်တန်းကျောင်းကို အေအေ က ဝင်တိုက်

ပြီးခဲ့တဲ့မတ်လ ၂၃ ရက်နေ့ကလည်း မင်းပြား စစ်သင်တန်းကျောင်းကို အေအေ က ဝင်တိုက်ခဲ့ပါတယ်။

တပ်မတော် ဘက်က ထုတ်ပြန်တာက တော့ အေအေ အင်အား ၃၀၀ခန့်က ဝင်တိုက်ခဲ့တာလို့ပြောပါတယ်။

နှစ်ဘက်အကျအဆုံးတွေရှိတယ်လို့ သိရပေမယ့်မြန်မာတပ်မတော်ဘက် ကရော အေအေ ဘက် ကပါ အတည်ပြု သတင်းထုတ်ပြန်တာ မတွေ့ရသေးပါဘူး ။

မတ်လ ၂၃ ရက်နေ့ မနက် ၆ နာရီလောက် ကစတင်ခဲ့တဲ့ အဲဒီတိုက်ပွဲဟာ ညနေ၄ နာရီ လောက်အထိ တိုက်ပွဲတွေ ဆက်လက်ဖြစ်ပွားနေကြောင်းနဲ့ ဂျက်တိုက်လေယဉ်တွေ သုံးတာတွေ့ရကြောင်း ဒေသခံတွေက ဘီဘီစီကိုပြောပါတယ်။

ဒီတိုက်ပွဲနဲ့ ပတ်သက်ပြီး တပ်မတော်သတင်းမှန်ပြန်ကြားရေးအဖွဲ့က သတင်း ထုတ်ပြန်ရာမှာတော့ ကျောင်းဌာနချုပ် တပ်ပတ်လည် ကနေ ခံစစ်စနစ်တကျ ပစ်ကူ၊ ပစ်အားသုံး တန်ပြန်တိုက်ခိုက်ခဲ့တဲ့ အတွက် ထိခိုက်ကျဆုံးများစွာနဲ့ နံနက်၁၁နာရီအချိန်ခန့်မှာအေအေတပ်ဖွဲ့ဝင်တွေ ဖရိုဖရဲ ဆုတ်ခွာထွက်ပြေးသွားခဲ့ကြတယ်လို့ ဖော်ပြထားပါတယ်။

ဒီလို တပ်မတော်ဘက်က သတင်းထုတ်ပြန်တဲ့အပေါ် အေအေ ရဲ့ ပြောခွင့်ရသူ ခိုင်သုခ ကတော့ တိုက်ပွဲနဲ့ ပတ်သက်ပြီး အသေးစိတ်အချက်အလက်တွေကို များမကြာမီ ထုတ်ပြန်ပေးမှာဖြစ်တဲ့ အတွက် လောလောဆယ် မပြောနိုင်သေးဘူးလို့ ပြောဆိုသွားပါတယ်။

တိုက်ပွဲဖြစ်ပွားတဲ့နေရာဟာ ရန်ကုန်-စစ်တွေ အဝေးပြေးလမ်းမကြီး နဲ့ မလှမ်းမကမ်းမှာရှိပြီးတော့ ဒေသခံတွေကတော့ အမှတ် ၉ တိုင်းဗဟို လေ့ကျင့်ရေးကျောင်းအဖြစ် လူသိများပါတယ်။

ရခိုင်ပြည်နယ် မင်းပြားမြို့နယ် နဲ့ မြေပုံမြို့နယ် အကြား ရခိုင်ပြည်နယ် အတွင်းပိုင်းကျတဲ့ နေရာမှာ တည်ရှိတဲ့ စစ်ဘက်ဆိုင်ရာ အရေးကြီးတဲ့ ကျောင်းတစ်ကျောင်း လို့ဒေသခံတွေကပြောပါတယ်။

ကျောက်တော်က တင်းမကြီးရွာမှာ လက်နက်ကြီးကျလို့ လူနေအိမ်တချို့မီးလောင်၊ ရွာလုံးကျွတ်ထွက်ပြေး

ကျောက်တော်မြို့နယ် ကုလားတန်မြစ်ကြောင်းအတွင်းက တင်းမကြီးကျေးရွာမှာ မတ်လ ၂၂ ရက်နေ့မနက် ၁၁ နာရီလောက်မှာ လက်နက်ကြီးကျည် တွေကျရောက်ခဲ့လို့ လူနေအိမ်တချို့မီးလောင်မှုဖြစ်ပွားခဲ့တယ်လို့ ဒေသခံတွေကပြောပါတယ်။

တင်းမကြီးကျေးရွာမှာ အိမ်ခြေ ၇၀၀ ကျော်ရှိပြီး လူဦးရေ ၄၀၀၀ ကျော်နေထိုင်နေပါတယ်။ ပြီးခဲ့တဲ့ မတ်လ ၁၅ ရက်နေ့ကလည်း လက်နက်ကြီးတွေကျလို့ လူနေအိမ် ၁၄ ဆောင် မီးလောင်ကျွမ်းခဲ့တယ်လို့ တင်းမကြီးကျေးရွာနားက ဒေသခံတွေပြောပါတယ်။

၂၀၂၀ ခုနှစ် ဖေဖော်ဝါရီလ ပထမအပတ်ကနေ မတ်လ ၂၂ ရက်နေ့အထိ ဖြစ်ပွားခဲ့တဲ့တိုက်ပွဲတွေကြောင့် ကုလားတန်မြစ်ကြောင်းအတွင်းမှာရှိတဲ့ ကျေးရွာပေါင်း ၁၀ ကျော်က ကျေးရွာသား ၄၀၀၀ ကျော်က ကျောက်တော်မြို့ပေါ်ကို လာရောက်ခိုလှုံနေကြရပြီး အနည်းဆုံးရွာပေါင်း ၇ ရွာလောက်က မီးလောင်ကျွမ်းခဲ့ပါတယ်။

အေအေကို အကြမ်းဖက်အဖွဲ့ကြေညာ အပြီးမှာ နှစ်ဖက်တိုက်ခိုက်မှု တွေအခုထက်အရှိန်မြင့်လာမှာကိုတော့ဒေသခံတွေကစိုးရိမ်နေကြပါတယ်။


ติดตามข่าวสด


ข่าวเด่นประจำวัน













ภาพที่



อัลบั้มภาพ နယ်ခြားစောင့်ရဲကားတန်းကိုအေအေတိုက် အရာရှိကြီးတစ်ဦးအပါအဝင် ၃ ဦးကျဆုံး
ข่าวที่เกี่ยวข้อง