Khaosod
Online

วันพฤหัสบดี ที่ 4 มิ.ย. 2563

ကျောက်တော်မြို့ပေါ်ပစ်ခတ်မှု အရပ်သား ၅ ဦးသေ၊ ၇ ဦးဒဏ်ရာရ

2 เม.ย. 2563 - 18:44 น.

ရခိုင်ပြည်နယ်မြောက်ပိုင်း တိုက်ပွဲတွေဖြစ်နေတဲ့ ကျောက်တော်မြို့ပေါ်မှာ ဧပြီ ၁ ရက်ညနေ ၅ နာရီခွဲလောက်မှာ ပစ်ခတ်မှုတွေဖြစ်ပွားခဲ့ပြီး အရပ်သား ၅ ဦးသေဆုံးကာ အနည်းဆုံး ၇ ဦးခန့်ထိခိုက် ဒဏ်ရာတွေ ရရှိခဲ့ကြပါတယ်။

ထိခိုက်သေဆုံးခဲ့ရသူ အားလုံးဟာ အရပ်သားတွေဖြစ်ကြပြီး အသက်ကြီးပိုင်းတွေ၊ အမျိုးသမီးတွေနဲ့ ကလေးငယ်တွေပါဝင် တယ်လို့ ကျောက်တော်မဲဆန္ဒနယ်မြေ အမျိုးသားလွှတ်တော်ကိုယ်စားလှယ် ဦးဦးထွန်းဝင်း ပြောပါတယ်။

ကျောက်တော်မြို့ပေါ် ပစ်ခတ်မှုဖြစ်စဉ်ဖြစ်ပွားရတာနဲ့ ပတ်သက်လို့ တပ်မတော်သတင်းမှန်ပြန်ကြားရေးအဖွဲ့နဲ့ အနောက်ပိုင်းတိုင်း စစ်ဌာနချုပ်တို့ကို ဘီဘီစီက ဆက်သွယ်မေးမြန်းခဲ့ရာမှာတော့ အဆက်အသွယ် မရရှိခဲ့ပါဘူး။

ပစ်ခတ်မှုကြောင့် လက်နက်ကြီး၊ လက်နက်ငယ်ကျည်တွေ မြို့တွင်းနေရာတော်တော်များများကို ကျရောက်ပေါက်ကွဲခဲ့ သလို၊ မြို့ပြင်နေရာတွေကိုလည်း ကျရောက်ခဲ့တာကြောင့် ၊မြို့တွင်းကနေအိမ်တွေမှာ ရှိနေသူတွေနဲ့ မြို့ပြင်က လုပ်ငန်းခွင်တွေမှာ အလုပ်လုပ်ကိုင်နေကြသူတွေ ထိခိုက်သေဆုံးခဲ့ကြရတာဖြစ်တယ်လို့ ဒေသခံတွေဆီကနေ သိရပါတယ်။

အဲ့ဒီပစ်ခတ်မှုမတိုင်ခင် ဧပြီ ၁ ရက်နေ့ မနက်ပိုင်းက ကျောက်တော်မြို့နဲ့ အနာက်ဘက် နှစ်မိုင်ခန့်အကွာမှာရှိတဲ့ သရက်အုပ်ကျေးရွာမှာလည်း ပစ်ခတ်မှုတွေရှိခဲ့တယ်လို့ ဒေသခံတွေက ပြောပါတယ်။

"ကျွန်တော်တို့ သိရသလောက်ကတော့ သရက်အုပ်ရွာဘက်က အဲ့ဒီစစ်ကြောင်းပြန်လာတဲ့အချိန်မှာ စဖြစ်တယ်လို့ ဒီလိုပဲလူတွေပြောကြတယ်။ ပြီးတော့ မြင်လိုက်တဲ့လူတချို့ပြောတာက တံတားပေါ်ကနေလည်း ပစ်တာရှိတယ်လို့ပြောကြတယ်။ မြို့တွင်းကိုရောက်လာပြီးတော့ လမ်းမပေါ်ကနေ ပစ်ခတ်တာတွေကိုလည်း ကြားလိုက်ရတယ်လို့ဆိုတယ်။ ဒါမျိုး ဒီဇင်ဘာ ၃၀ နေ့ကလည်းတစ်ကြီမ်ဖြစ်ခဲ့တယ်။ မြို့တွင်းမှာဖြစ်တာ တော်တော်လေးကိုစိုးရိမ်ရပြီးတော့ ဆိုးဆိုးဝါးဝါးဖြစ်ခဲ့တယ်လို့ ပြောရမှာပဲ"လို့ ဦးဦးထွန်းဝင်း ပြောပါတယ်။

သေဆုံးခဲ့သူတွေကတော့ ဦးမောင်အေးကျော် အသက် ၅၈ နှစ်၊ ပြည်တော်သာရပ်ကွက်၊ ဦးမောင်ကြာ အသက် ၇၂ နှစ် ရွာမပြင်ကျေးရွာ၊ ဒေါ်မထွီး အသက် ၅၄ နှစ်နဲ့ ၊ သူ့ရဲ့သမီးဖြစ်သူ မဖြူဖြူအေး အသက် ၁၄ နှစ် ပိန္နဲချောင်းကျေးရွာ၊ ဒေါ်ကုလားမစိန် အသက် ၆၂ နှစ် ပြည်တော်သာရပ်ကွက်တို့ဖြစ်ကြပါတယ်။

ဒဏ်ရာရရှိခဲ့သူတွေကတော့ ပြည်တော်သာရပ်ကွက်က အသက် ၂၈ နှစ်အရွယ် ဦးငစလုံးနဲ့ သူ့ရဲ့သားဖြစ်သူ အသက် ၉ နှစ်အရွယ် မောင်ထွန်းလှိုင်၊ အသက် ၃၄ နှစ်အရွယ် ဒေါ်မသိန်းဝေ၊ အသက် ၁၂ နှစ်အရွယ် မောင်ကျော်မျိုးသန်း၊ အသက် ၂၈ နှစ်အရွယ် ကိုမောင်စိုးဝင်း၊ အသက် ၂၅ နှစ်အရွယ် မောင်နေဆန်းလင်းနဲ့ သင်္ဘောကွေ့ကျေးရွာသူ ဒိုင်းနက်အမျိုးသမီး အသက် ၁၇ နှစ်အရွယ် မမိုးမိုးနွယ်တို့ ဖြစ်ကြပါတယ်။

မမိုးမိုးနွယ်ဟာ သင်္ဘောကွေ့ကျေးရွာကနေ ကျောက်တော်မြို့ပေါ် ပြည်တော်သာရပ်ကွက်အနီးမှာရှိတဲ့ အုတ်ဖုတ်လုပ်ငန်း တစ်ခုမှာ ဝင်ရောက်အလုပ်လုပ်ကိုင်နေသူဖြစ်ပြီး လုပ်ငန်းခွင်အတွင်းကျည်ထိမှန်ခဲ့တာဖြစ်ပါတယ်။

သေဆုံးသူ ၅ ယောက်အနက် လေးယောက်က ကျည်ထိမှန်ခဲ့တဲ့နေရာတွေမှာ ပွဲချင်းပြီးသေဆုံးခဲ့ကြတာဖြစ်ပြီး အမျိုးသမီးကြီးတစ်ဦးက ဆေးရုံကိုရောက်ပြီးမှ သေဆုံးသွားခဲ့တာဖြစ်တယ်လို့ လွှတ်တော်ကိုယ်စားလှယ် ကပြောပါတယ်။

လက်ရှိအတည်ပြုထားတဲ့ ထိခိုက်ဒေသဆုံးမှုစာရင်းမှာ ဆေးရုံပေါ်ကိုရောက်လာတဲ့သူတွေသာဖြစ်ပြီး ဒဏ်ရာမပြင်းထန်တဲ့ အတွက် မိမိတို့ရဲ့နေအိမ်တွေမှာပဲ ဆေးဝါးကုမှုခံယူနေသူတွေလည်း နောက်ထပ်အများအပြားရှိနိုင်သေးတယ်လို့ ဦးဦးထွန်းဝင်း ပြောပါတယ်။

သေဆုံးသူ ၅ ဦးထဲက ရွာမပြင်ကျေးရွာသား အသက် (၇၂)နှစ် အရွယ် ဦးမောင်ကြာဟာ မြို့သစ်ရပ်ကွက်မှာရှိတဲ့ အုပ်ဖုတ်စက်ရုံက သားသမီးတွေဆီကိုရောက်ရှိနေချိန် အခုလို ကျည်ထိမှန်သေဆုံးသွားတာဖြစ်ပြီး သူ့ရဲ့ဘယ်ဘက်နောက်ကျောကနေ ရင်အုပ်ပေါ်ကို သေနတ်ကျည်ဖောက်ထွက်သွားတယ်လို့ မိသားစုတွေကပြောပါတယ်။

အခုလိုမျိုး ဖြစ်စဉ်တွေကြောင့် ပြည်သူတွေ ဒုက္ခရောက်ခဲ့ရပြီး စီးပွားရေးလုပ်ငန်းတွေမှာလည်း အခက်အခဲတွေ ဖြစ်ကြရသလို မိသားစုရပ်တည်ရေးအတွက်လည်း အခက်အခဲတွေဖြစ်သွားနိုင်တာကြောင့် တိုက်ပွဲတွေကိုရပ်တန့်ပေး စေချင်တယ်လို့ သေဆုံးသူ ဦးမောင်ကြာရဲ့ဇနီးဖြစ်သူ ဒေါ်ကျော့စိန်ကပြောပါတယ်။

ဒါ့အပြင် ဧပြီ ၁ ရက်နေ့မှာဖြစ်ပွားခဲ့တဲ့ ဖြစ်စဉ်အတွင်း ဖမ်းဆီးခံရသူ ၉ ဦးရှိနေပြီး အဲ့ဒီလူတွေကတော့ မနက်ပိုင်းမှာတပ်မတော်စစ်ကြောင်းဝင်ရောက် စစ်ဆေးခဲ့တဲ့ သရက်အုပ်ကျေးရွာသားသုံးဦး၊ ညနေပိုင်းဖြစ်စဉ်မှာ ကျောက်တော်မြို့ပေါ် ပြည်တော်သာရပ်ကွက်နဲ့အနီး မြို့အစွန်က အုတ်ဖုတ်လုပ်ငန်းမှာ အလုပ်လုပ်ကိုင်နေကြတဲ့ အလုပ်သမား ၆ ဦးတို့ကို တပ်မတော်က ဖမ်းဆီးခေါ်ဆောင်ခြင်း ခံလိုက်ရတယ်လို့ ဦးဦးထွန်းဝင်းက အတည်ပြုပြောဆိုပါတယ်။

အုတ်ဖုတ်လုပ်ငန်းခွင် အတွင်းက ဖမ်းဆီးခံလိုက်ရသူတွေကတော့ ပြည်တော်သာရပ်ကွက်က ကိုငြိမ်းထက်အောင် အသက် ၂၁ နှစ်၊ ကိုလမင်း အသက် ၂၅ နှစ်၊ ဦးနိုင်ချေ အသက် ၃၅ နှစ်၊ ကိုငြိမ်းထွန်းအောင် အသက် ၂၈ နှစ်၊ ကိုညီချေ အက် ၁၇ နှစ်၊ ဦးသောင်းတင်ဌေး အသက် ၄၅ နှစ်တို့ဖြစ်ကြပါတယ်။

အခုလိုမျိုး ကျောက်တော်မြို့ပေါ်မှာပစ်ခတ်မှုဖြစ်ပွားခဲ့တာ လေးကြိမ်ရှိပြီဖြစ်ကာ ၂၀၁၉ ခုနှစ် ဒီဇင်ဘာ ၃၀ ရက်နေ့ဖြစ်စဉ်နဲ့ ၂၀၂၀ ခုနှစ် ဧပြီ ၁ ရက်နေ့ဖြစ်စဉ်ကတော့ အပြင်းထန်ဆုံးဖြစ်ပွားခဲ့ကြတာဖြစ်ပြီး မနေ့ကပစ်ခတ်မှုမှာ အရပ်သားထိခိုက်သေဆုံးမှုတွေ များပြားခဲ့တဲ့အတွက် ကျောက်တော်ဒေခံတွေ အနေနဲ့ တော်တော်လေးကို စိုးရိမ်ကြောက်လန့်မှုတွေ ဖြစ်နေကြတယ်လို့ ဆိုပါတယ်။

လက်ရှိမှာ ကျောက်တော်မြို့ပေါ်ကို လာရောက်ခိုလှုံ့နေကြတဲ့ စစ်ဘေးရှောင်ဦးရေ ၇ ထောင်ဝန်းကျင်လောက်ရှိနေပြီး အမိုးအကာမလုံခြုံတဲ့နေရာတွေမှာနေထိုင်နေကြရတဲ့ အဲ့ဒီစစ်ဘေးရှောင်တွေအတွက်လည်း တော်တော်လေးကို စိုးရိမ်နေရတဲ့အနေအထားရှိနေတယ်လို့ ဦးဦးထွန်းဝင်းက ပြောပါတယ်။

အခုလိုမျိုး မြို့ပေါ်မှာ ပစ်ခတ်မှုတွေဖြစ်ပွားနေတဲ့အတွက် တိုက်ပွဲနဲ့မသက်ဆိုင်သူတွေ ထိခိုက်သေဆုံးမှုတွေနဲ့ ရင်ဆိုင်နေကြရတာကြောင့် လူစည်ကားတဲ့နေရာတွေမှာ နှစ်ဖက်တိုက်ပွဲတွေမဖြစ်ပွားကြဖို့အတွက် မေတ္တာရပ်ခံလိုတယ်လို့ လွှတ်တော်ကိုယ်စားလှယ် ဦးဦးထွန်းဝင်းက ပြောကြားခဲ့ပါတယ်။

line-qr

เกาะติดข่าวสำคัญ

กดติดตาม "ข่าวสด"

single-line

ติดตามข่าวสด


ข่าวเด่นประจำวัน













ภาพที่



อัลบั้มภาพ ကျောက်တော်မြို့ပေါ်ပစ်ခတ်မှု အရပ်သား ၅ ဦးသေ၊ ၇ ဦးဒဏ်ရာရ
ข่าวที่เกี่ยวข้อง