Khaosod
Online

วันพฤหัสบดี ที่ 4 มิ.ย. 2563

ပေါက်ခေါင်းကကိုဗစ်၁၉ လူနာနဲ့ထိတွေ့သူ လေးဆယ်ကျော်ကို အသွားအလာ ကန့်သတ်၊ ဗိုင်းရပ်စ်ကူးစက်ခံရသူ တစ်သန်းကျော်ပြီ၊ဂျပန်ရဲ့ ဗိုင်းရပ်စ်ကိုင်တွယ်ပုံနဲ့ မြန်မာတစ်ဦးရဲ့အတွေ့အကြုံစတဲ့ဧပြီ ၃ရက်ထိပ်တန်းသတင်းများ

3 เม.ย. 2563 - 09:42 น.

(၁) ပေါက်ခေါင်းက ကိုဗစ်၁၉ လူနာနဲ့ ထိတွေ့ခဲ့သူ လေးဆယ်ကျော်ကို သီးသန့်ခွဲခြားစောင့်ကြည့်

ပေါက်ခေါင်းက ဒုတိယမြို့နယ်အုပ်ချုပ်ရေးမှူး ဖြစ်တဲ့ ကိုဗစ်၁၉ လူနာ နံပါတ် ၁၇ နဲ့ ထိတွေ့ခဲ့သူ လေးဆယ်ကျော်ကို ဒီနေ့ ဧပြီ ၃ ရက်က စလို့ သီးသန့်ခွဲခြားစောင့်ကြည့်မှုတွေ စတင်ပြုလုပ်ခဲ့တယ်လို့ စောင့်ကြည့်ခံရသူထဲမှာပါဝင်တဲ့ ပေါက်ခေါင်းအမတ် ဦးသက်မင်းဇော်က ဘီဘီစီကိုပြောပါတယ်။

လူနာတက်ရောက်တဲ့ မြို့နယ်အစည်းအဝေးတစ်ခုကို ဦးသက်မင်းဇော်အပါအဝင် လွှတ်တော်ကိုယ်စားလှယ်လေးဦး၊ ပေါက်ခေါင်းအထွေထွေအုပ်ချုပ် ရေးမှူးဦးစီးဌာနက တာဝန်ရှိသူတွေနဲ့ စုစုပေါင်း အယောက် ၂၀ လောက် တက်ရောက်ခဲ့ကြပါတယ်။

ဒါ့အပြင် လူနာနဲ့ ထိတွေ့မှုရှိခဲ့တဲ့ ထွေအုပ်ရုံးက ဝန်ထမ်းတွေကိုပါ သီးသန့်စောင့်ကြည့်မှာဖြစ်လို့ စုစုပေါင်း အယောက် ၄၀ ကျော်ရှိတယ်လို့ ဦးသက်မင်းဇော်ကပြောပါတယ်။

"မတ်လ ၃၁ ရက်နေ့မှာ သူ့ရဲ့အမျိုးသမီးက ပေါ့စစ်တစ်လူနာလို့ သိရတည်းက ကျွန်တော်က Home quarantine (နေအိမ်မှာ သီးသန့်ခွဲခြားနေထိုင် ခြင်း) လုပ်နေလိုက်ပါတယ်။ အပြင်လည်းမထွက်တော့ဘူးပေါ့။ ဒါပေမဲ့ ကျွန်တော်တို့ကတော့ ကြိုတင်တော့ မှန်းထားမိပါတယ်။ အကောင်းဆုံးတော့ မျှော်လင့်ထားတာပေါ့။ အဆိုးဆုံးကို ရင်ဆိုင်ဖို့လည်း ပြင်ထားပါတယ်။ အခု ညက ဆေးစစ်ချက်ထပ်ထွက်တော့ Facility quaratine (အစိုးရက စီစဉ်ပေးတဲ့ သီးသန့်စောင့်ကြည့်တဲ့နေရာ) ကို ဒီမနက် ရောက်ပါတယ်။ အထက ကျောင်းနဲ့ ပုဗ္ဗာရုံဆိုတဲ့ ဘုန်းကြီးကျောင်း နှစ်နေရာခွဲထားပေးပါတယ်" လို့ ဦးသက်မင်းဇော်က ပြောပါတယ်။

လတ်တလောမှာ စောင့်ကြည့်ခံရသူအားလုံးရဲ့ ကျန်းမာရေးအခြေအနေကောင်းမွန်တယ်လို့ သူက ဆက်ပြောပါတယ်။

ဒီနေ့ကစလို့ ပေါက်ခေါင်းမြို့မှာ လူအစည်ကားဆုံး ပေါက်ခေါင်းဈေးကြီးကို ပိတ်ထားလိုက်ပြီဖြစ်ပြီး မြို့ဝင်ထွက်ဂိတ်တွေမှာလည်း ကျန်းမာရေးစစ်ဆေး မှုတွေ ပြုလုပ်ပြီး ဝင်ထွက်သွားလာခွင့် ပြုနေတယ်လို့ ဦးသက်မင်းဇော်က ပြောပါတယ်။

ပေါက်ခေါင်းက အတည်ပြုလူနာ လေးဦးအနက် အသက် ၁၀ နှစ် နဲ့ ၈ နှစ်အရွယ် ကလေးနှစ်ဦး ပါဝင်ပြီး ဒါဟာ မြန်မာနိုင်ငံမှာ ကိုဗစ်ကူးစက်ခံရတဲ့ အသက်အငယ်ဆုံးကလေးငယ်တွေ ဖြစ်လာပါတယ်။

ရန်ကုန်မြို့၊ ပုဂ္ဂလိကဆေးခန်းတစ်ခုမှာ တာဝန်ထမ်းဆောင်တဲ့ အမျိုးသမီးမှာ ကိုဗစ် ၁၉ ကူးစက်ခံရကြောင်း တွေ့ရှိပြီးတဲ့နောက် သူနဲ့ ထိတွေ့ခဲ့တဲ့ ပေါက်ခေါင်းက မိသားစုကို နေအိမ်မှာ သီးသန့်ခွဲခြားစောင့်ကြည့်ခဲ့ပြီး ကိုဗစ်၁၉ ရှိမရှိ စစ်ဆေးခဲ့တာဖြစ်ပါတယ်။

ဧပြီ ၂ ရက်ညပိုင်းမှာတော့ လူနာနံပါတ် ၁၅ ဖြစ်တဲ့ ဒီအမျိုးသမီးရဲ့ မိသားစုဝင်တွေဖြစ်တဲ့ ခင်ပွန်းဖြစ်သူ ဒုတိယမြို့နယ်အုပ်ချုပ်ရေးမှူး၊ သားသမီး နှစ်ဦးနဲ့ အသက် ၁၈ နှစ်အရွယ် တူမဖြစ်သူတို့မှာ ကိုဗစ် ၁၉ ကူးစက်ခံရကြောင်း အစိုးရက ထုတ်ပြန်ခဲ့ပါတယ်။

ဒီလူနာလေးဦးကို သတ်မှတ်ဆေးရုံတွေကို စနစ်တကျလွှဲပြောင်းပြီး သီးခြားထားရှိကုသပေးမယ်လို့ အစိုးရက ဆိုပါတယ်။

မြန်မာမှာ ကိုရိုနာဗိုင်းရပ်စ် ကူးစက်သူ ၂၀ ဦးရှိလာပြီး ရောဂါအခံရှိသူ အသက်အကြီးပိုင်းအရွယ် အမျိုးသားတစ်ဦး သေဆုံးထားပါတယ်။

() ကိုရိုနာဗိုင်းရပ်စ် ကူးစက်သူပေါင်းတစ်သန်းကျော်သွားပြီ

တစ်ကမ္ဘာလုံးက ကျန်းမာရေးဝန်ထမ်းတွေ ကပ်ရောဂါကို ခုခံနေကြရ
Getty Images
တစ်ကမ္ဘာလုံးက ကျန်းမာရေးဝန်ထမ်းတွေ ကပ်ရောဂါကို ခုခံနေကြရ

ကမ္ဘာတစ်ဝန်း ကိုရိုနာဗိုင်းရပ်စ် ကူးစက်ခံရသူပေါင်း တစ်သန်းကျော်သွားပြီလို့ အမေရိကန်ပြည်ထောင်စု၊ ဂျွန်ဟော့ပ်ကင်းတက္ကသိုလ်ရဲ့ သုတေသနက ဆိုပါတယ်။

လူပေါင်း ၅၃,၀၀၀ ကျော်သေဆုံးခဲ့ပြီး လူ ၂၁၀,၀၀၀ ကျော် ပြန်လည်ကျန်းမာလာခဲ့တယ်လို့လည်း ဆိုပါတယ်။

အမေရိကန်က ကမ္ဘာ့နိုင်ငံတွေထဲ ကူးစက်ခံရသူအများဆုံးနဲ့ အီတလီက သေဆုံးနှုန်းအများဆုံး ဖြစ်နေပါတယ်။

ဒီ ကိုဗစ်၁၉ ဗိုင်းရပ်စ်ဟာ တရုတ်ပြည်အလယ်ပိုင်း ဝူဟန်ကနေ စဖြစ်ခဲ့တာ အခုဆို သုံးလကျော်သွားခဲ့ပါပြီ။

ဗိုင်းရပ်စ် ကူးစက်သေဆုံးမှုနှုန်းပြ ဂရပ်ဖ်
BBC
ဗိုင်းရပ်စ် ကူးစက်သေဆုံးမှုနှုန်းပြ ဂရပ်ဖ်

ဂျွန်ဟော့ပ်ကင်းတက္ကသိုလ်ရဲ့ အဆိုအရ လူတစ်သန်းကျော်ကူးစက်ခံရတယ်ဆိုပေမယ့် ဒီထက်အရေအတွက် ပိုများနိုင်ပါတယ်။

ပထမတစ်ကြိမ် ကူးစက်ခံရမှု တစ်သိန်းပြည့်ဖို့ကို တစ်လခွဲပဲ ကြာခဲ့တဲ့အတွက်ပါ။ ပြီးခဲ့တဲ့သတင်းပတ်တွင်းမှာ နှစ်ဆတိုးနှုန်းနဲ့ ခုလို လူတစ်သန်း ကျော်ထိ ရောက်လာခဲ့ပါတယ်။

ရောဂါဖြစ်ပွားသူရဲ့ လေးပုံတစ်ပုံက အမေရိကန်ပြည်ထောင်စုကဖြစ်ပြီး ဒါက ဥရောပမှာဖြစ်ပွားသူရဲ့ တစ်ဝက်ခန့်ရှိပါတယ်။

နောက်ဆုံးအခြေအနေ

စပိန်မှာ တစ်ရက်တည်းနဲ့ လူ ၉၅၀ သေဆုံးခဲ့ပြီး ဒါဟာ ၂၄ နာရီအတွင်း လူသေဆုံးမှုအများဆုံး နိုင်ငံလည်း ဖြစ်ခဲ့တာပါ။

စပိန်မှာ ကူးစက်ခံရသူ ၁၀၂၁၃၆ ဦးရှိခဲ့ပြီး အရင်ရက်တွေကထက် ကူးစက်မှုနှုန်း ၈ ရာခိုင်နှုန်း တက်လာခဲ့တာ ဖြစ်ပါတယ်။

အာဏာပိုင်တွေကတော့အခုအခါ ဗိုင်းရပ်စ် ကူးစက်မှုနှုန်းအထွဋ်အထိပ်ကိုရောက်နေပြီး လာမယ့်ရက်တွေအတွင်း ပြန်လည်ကျဆင်းသွားမယ်လို့ မျှော်လင့်နေပါတယ်။

စပိန်ဟာ ဗိုင်းရပ်စ်နဲ့သေဆုံးသူ ဒုတိယအများဆုံးဖြစ်ပြီး အလုပ်လက်မဲ့ပေါင်း ကိုးသိန်းလောက် ရှိခဲ့ပါတယ်။

အမေရိကန်မှာတော့ အလုပ်လက်မဲ့ ခံစားခွင့် စာရင်းသွင်းသူ ၆ ဒသမ ၆ သန်းကျော်ရှိလာတယ်လို့ ပြောပါတယ်။

() ဂျပန်ရဲ့ ဗိုင်းရပ်စ်ကိုင်တွယ်ပုံနဲ့ မြန်မာတစ်ဦးရဲ့အတွေ့အကြုံ

ဂျပန်မှာ ဒီသတင်းပတ်တွေအတွင်း ကိုရိုနာဗိုင်းရပ်စ် ကူးစက်မှုနှုန်းမြင့်တက်လာတဲ့အတွက် လာမယ့်သတင်းပတ်ကုန်ရက်တွေမှာ လူတွေတက်နိုင်သလောက်အပြင်မထွက်ဘဲ နေကြဖို့ အစိုးရက သတိပေးထားပါတယ်။ ဒါပေမဲ့ အိုင်တီနယ်ပယ်က ကုမ္ပဏီတွေကလွဲလို့ အလုပ်တွေရုံးတွေအများစုကတော့ ပုံမှန်တက်နေရဆဲဖြစ်ပြီး ကူးစက်နှုန်းတိုးလာတဲ့အပေါ် စိုးရိမ်တယ်လို့ ဂျပန်နိုင်ငံ၊ တိုကျိုမြို့မှာ နေထိုင်တဲ့ မသီတာဦးက ဘီဘီစီကိုပြောပါတယ်။

"ဒီတစ်ပတ်ကိုပဲ နေ့စဉ် ကူးစက်သူက တိုးလာနေတာ။ ဒါ တိုကျိုတစ်ခုတည်းပေါ့။ တခြားမြို့နယ်တွေမပါသေး။ ကျွန်မတို့လည်း ပုံမှန်ရုံးတက်နေရတုန်းပဲ။ ကျွန်မက ရုံးကိုပြောတယ်။ နေ့စဉ် ငါကြောက်နေရတယ်။ ရထားပေါ်လဲလူကအပြည့် လို့ ရုံးတက်ရမယ်ဆိုတစ်ခုခုလုပ်ပေးပါဆိုပြီးတောင်းဆိုတယ်။ အဲဒါနဲ့ ကိုယ်ပိုင်ကားရှိတဲ့သူက ကားနဲ့လာ၊ မရှိတဲ့သူကို အကြိုအပို့ လုပ်ပေးတယ်။ ကားရပ်၊ လမ်းဖြတ်ခ စရိတ်ဘာညာကတော့ ရုံးကပေးပေါ့။ လာလောဆယ်က တော့ နိုင်ငံခြားတွေနဲ့ ဆက်သွယ်ရတဲ့အပိုင်းမှာလုပ်ရတယ်။ ကိုယ်နဲ့ဆက်သွယ်ရတဲ့ တခြားတိုင်းပြည်တွေကတော်တော်များများ lock down လုပ်နေတယ် "လို့ မသီတာဦးက ရှင်းပြပါတယ်။

ဂျပန်ဝန်ကြီးချုပ်ရဲ့ ကျန်းမာရေးဆိုင်ရာ အကြံပေးအဖွဲ့အကြီးအကဲကတော့ လူတွေ သူတို့အပြုအမူကို မပြောင်းလဲရင်တော့ တိုကျိုမှာ ကူးစက်မှုတွေအကြီးအကျယ်ဖြစ်နိုင်တယ်လို့ပြောပါတယ်။

ဂျပန်ပြည်သူတွေ အနေအထိုင် မဆင်ခြင်ရင်၊ ရောဂါကူးစက်နိုင်တဲ့ နေရာတွေ၊ ပွဲလမ်းသဘင်တွေမရှောင်နိုင်ရင် အခြေအနေဆိုးတွေနဲ့ ကြုံရနိုင်တယ်လို့ သူက ဆိုပါတယ်။

ဂျပန်မှာ လောလောဆယ် ဒီဇိုင်းနဲ့ပတ်သက်တဲ့ ပွဲတချို့ကို မလုပ်ဖို့ ကန်ဆယ်လုပ်ထားပေမယ့် တချို့ပွဲတွေကတော့ လုပ်နေကြတုန်းလို့လည်း မသီတာဦးက ဆိုပါတယ်။

"ဒီတနင်္လာနေ့တုန်းက မြို့တော်ဝန်က ပြောတယ်။ ကူးစက်မှူဟာ စားသောက်ဆိုင်တို့ ကလပ်တို့ဘားတို့က များလို့ ဒီလိုပျော်ပွဲရွှင်ပွဲတွေမသွားကြပါနဲ့ပြောတာကို တချို့ စိတ်ဆိုးတဲ့သူတွေရှိသေးတယ်။ ကျွန်မက ရုံးမှာ ကြောက်တယ်ဆိုတော့ နင်က ဘာကြောက်တာလဲငါတို့တော့မကြောက်ဘူးတဲ့" လို့ သူက ဆိုပါတယ်။

ဒါပေမဲ့ ဂျပန်မှာ ကံကောင်းတာတစ်ခုက ကိုရိုနာဗိုင်းရပ်စ် စတင်ပျံ့ပွားမှုမရှိသေးခင် နွေဦးရာသီအစဖြစ်ပြီး အဲဒီလိုအချိန် ဂျပန်မှာ ဖြစ်လေ့ဖြစ်ထရှိတဲ့ ဝတ်မှုန်အလာဂျီဖြစ်စဉ်ကြောင့် ဂျပန်နေသူအတော်များများ နှာခေါင်းစည်းတွေတပ်ကြတာကြောင့် ကူးစက်မှုနှုန်းနည်းနေသေးတယ်လို့ ယုံကြည်ရကြောင်း ဂျပန်မှာ ဆယ်စုနှစ်တစ်ခုကြာနေထိုင်နေတဲ့ မသီတာဦးက ဆိုပါတယ်။

line-qr

เกาะติดข่าวสำคัญ

กดติดตาม "ข่าวสด"

single-line

ติดตามข่าวสด


ข่าวเด่นประจำวัน













ภาพที่



อัลบั้มภาพ ပေါက်ခေါင်းကကိုဗစ်၁၉ လူနာနဲ့ထိတွေ့သူ လေးဆယ်ကျော်ကို အသွားအလာ ကန့်သတ်၊ ဗိုင်းရပ်စ်ကူးစက်ခံရသူ တစ်သန်းကျော်ပြီ၊ဂျပန်ရဲ့ ဗိုင်းရပ်စ်ကိုင်တွယ်ပုံနဲ့ မြန်မာတစ်ဦးရဲ့အတွေ့အကြုံစတဲ့ဧပြီ ၃ရက်ထိပ်တန်းသတင်းများ
ข่าวที่เกี่ยวข้อง